2023/03/02

Elgoibarko saltokiek bat egin dute “Otsailaren 11 erakusleihoak” ekimenarekin

Otsaileko Emakume eta Neska Zientzialariaren Nazioarteko eguna ospatzeko, eta martxoko emakumearen egunarekin bat eginaz, bi ekintza egingo dira Elgoibarren martxoaren 1etik 19ra.

Elgoibarko Udalak eta Elhuyarrek “Otsailaren 11 erakusleihoak” egitasmoa jarri dute martxan herriko 17 dendatan, emakumeek zientziaren eta teknologiaren arloan egiten duten lana ezagutarazteko. Bizilabe gazteentzako zientzia- eta teknologia-ekintzak egiteko aisialdi-eskaintzaren barruan kokatzen da ekimen hau eta, guztira, Bilbo, Abanto-Zierbena, Barakaldo, Mungia, Elgoibar, Deba, Beasain eta Donostiako 218 saltokik hartu dute parte. Udalerri guztietan buruta da ekintza (hemen saltoki parte-hartzaileen argazkiak), eta Elgoibarkoarekin emango zaio amaiera.

Otsailaren 11n ospatu den Emakume eta Neska Zientzialarien Nazioarteko Egunarekin bat eginez, erakusleihoak apaindu dituzte Elgoibarko 17 saltokik. Saltoki bakoitzari emakume zientzialari bat eskaini zaio, zientzialari horri buruzko ilustrazioekin eta informazioarekin batera. Guztira 12 emakume omenduko dira. Dendariek, egokitu zaien zientzialariaren ikerketa-lanean inspiratuta apaindu dute erakusleihoa. Hala, beraz, emakume zientzialarien bizitzaren eta lanaren dibulgatzaile bihurtuko dira dendariak, eta emakumeek zientziari egin dioten ekarpena ikusarazten lagunduko dute. Aurten, GINKANA batean parte hartzeko aukera ere izango da. Actionbound aplikazioa jaitsiz, dendaz denda, 12 emakumeen kartelak bilatu eta bertako QRak eskaneatuta, emakumeen inguruko galderei erantzun beharko zaie.

Emakume ikertzaile horien ilustrazioak Bizilaberen webgunean eskegi dira, beren lanari buruzko informazioarekin batera; informazio horretan, ikertzaileen bizitza, ibilbidea eta aurkikuntzak biltzen dira. Aurten emakume zientzialari hauek omendu dira:

Mari Luz Esteban Galarza (Pedrosa de Valdeporres, Burgos, 1959). Medikua eta antropologoa
Maryam Mirzajani (Teherán, Iran, 1977-2017). Matematikaria
Estibaliz Apellaniz Ingunza (Bilbo, Bizkaia, 1954). Geologoa
Emma Roca Rodríguez (Bartzelona, Katalunia, 1973-2021). Biokimikaria
Dorcas Muthoni (Nyeri, Kenya, 1979). Ingeniari informatikoa
Homira May Rezai (Jaghori, Afganistan, 1993). Medikua
Melissa Cristina Márquez Villalobos (San Juan, Puerto Rico, 1993). Itsas biologoa
Amaia Arranz Otaegui (Tolosa, Gipuzkoa, 1987). Historialaria eta arkeobotanikaria
Sally Ride (Encino, AEB, 1952-2012). NASAko fisikaria, dibulgatzailea eta astronauta
Maddi Astigarraga Bergara (Deba, Gipuzkoa, 1997). Ingeniari biomedikoa eta ilustratzaile zientifikoa
Ainara Sangroniz Agudo (Elgeta, Gipuzkoa, 1991). Kimikaria
Katalin Karikó (Szeged, Hungaria, 1955). Biokimikaria

Eta saltokiei dagokionez, hauek dira “Otsailaren 11 erakusleihoak” ekimenean parte hartuko duten Elgoibarko denden zerrenda:

Agurtzane Ileapandegia
Farmazabal
Astigarraga Gys Sport
Colchoneria Lagunak
Cristina Garcia. Estetika Eta Terapia Naturalak
Ecenarro
Eizaguirre Okindegia
Iriondo Kirolak
MGS Aseguruak
Olaia Martínez Estetika Zentroa
Peluquería Leire
Peluquería Meraki
Pitxintxu
Politxa
Roteta Elektrizitatea
Txillarre Ekodenda
Uzuri Optika

Bestalde, 'Elgoibarko 8 emakume STEMen kaleko erakusketa' ikusgai egongo da Lekueder parkean martxoaren 1etik 19ra. Hemen informazio gehiago.