Bilboko Bizilabek 10 urte bete ditu, eta Miribillara zabaldu da ikasturte berrian
Bilboko Bizilabek ikasturte berriari ekin dio, eta aurtengoa berezia izango da: hamar urte bete dira Elhuyarrek, Bilboko Udalarekin elkarlanean, Bizilabe egitasmoa hirian martxan jarri zuenetik. Deustun hasi zen ibilbideak hazten jarraitu du urtez urte, eta aurten beste urrats bat eman du, Miribilla auzora zabalduz.
Hala, 2026-2027 ikasturtean, Bilboko sei auzotan egongo da martxan Bizilabe: Deustun, Otxarkoagan, Zorrotzan, Basurtun, Alde Zaharreko Esperantzan eta Miribillan. Azken hori izango da aurtengo berrikuntza nagusietako bat, auzo horretako gazteei ere zientzia eta teknologia modu praktikoan eta sortzailean lantzeko aukera eskainiko baitzaie.
Hamar urte gazteen jakin-mina pizten
Hamarkada honetan, Bilboko Bizilabe erreferentziazko egitasmo bihurtu da gazteen artean zientziarekiko eta teknologiarekiko interesa sustatzeko. Deustuko lehen urratsetatik gaur egunera arte, 1.000 gaztek baino gehiagok parte hartu dute egitasmoan, eta Bizilaberen inguruko komunitatea ere handituz joan da.
Bizilaben, gazteak dira protagonistak. Esperimentuen, erronken eta proiektu zientifiko zein teknologikoen bidez, ikertzaile eta asmatzaile bihurtzeko aukera dute. Beren ideiak garatu, galderak egin, irtenbideak bilatu eta taldean lan egiten dute, betiere sormena, jakin-mina eta pentsamendu kritikoa sustatuz.
Egitasmoaren helburua ez da soilik zientzia eta teknologia ezagutaraztea, baizik eta gazteei arlo horiekin lotutako esperientzia positiboak eskaintzea, zientzia eguneroko bizitzaren parte dela erakutsiz. Era berean, genero-estereotipoak gainditzea eta nesken parte-hartzea sustatzea ere badira Bizilaberen oinarrietako batzuk.
Miribilla, Bizilabe sareko auzo berria
Aurten, Miribillako gazteek ere Bizilaberen komunitatearekin bat egiteko aukera izango dute. Auzo berria gehitzeak Bilboko Bizilabe sarea indartzen du, eta zientzia eta teknologia hiriko gero eta gazte gehiagorengana hurbiltzeko beste urrats bat da.
Hamar urteko ibilbidearen ondoren, Bilboko Bizilabek etorkizunari begira jarraitzen du, gazteen jakin-mina, sormena eta ikertzeko gogoa ardatz hartuta. Ikasturte berri honetan ere, galdera berriak, esperimentu berriak eta proiektu berriak izango dira protagonista Bilboko sei auzoetan.