Bizilabeko gazteek Bilboko Ingeniaritza Eskola bisitatu dute

Aste honetan zehar, Bizilabeko gazteak EHUko Ingeniaritza Eskolan izan dira. Ordu eta erdiko bisitan zehar bertako ikasleekin egoteko aukera izan dute eta euren proiektuak gertu-gertutik ezagutu dituzte.

Lehenik, Formula Student-eko gazteek euren autoak erakutsi dizkiete. Azken urteotan lehiaketetara aurkeztutako autoak ikusi dituzte eta horren esperientziaren berri eman diete. Gainera une honetan eraikitzen ari diren autoa ere ikusi dute eta hau nola egiten dute azaldu diete ingeniaritza ikasleek.

Segidan, Bisky Team-en izan dira. Ikasle hauek suziriak egiten dituzte. Kasu honetan ere, hauek nola egiten dituzten ikusi dute eta arretaz entzun dituzte euren azalpenak.

Bizilabeko gazteei asko gustatzen zaie halako bisitak egitea. Oso garrantzitsua da hori. Izan ere, ikerketek erakusten dute gazteek aisialdian izaten dituzten zientzia eta teknologia-bizipenek eragina dutela etorkizuneko ikasketak aukeratzerako orduan. Gainera, ikasle gazteak ezagutzeak erreferente errealak hurbiltzea dakar eta honek euren burua etorkizunean ikasketa horietan kokatzen lagun dezake.