2026 urteko ekimena

Otsailaren 11n Emakume eta Neska Zientzialarien Nazioarteko Eguna ospatzen da nazioartean. Hori dela eta, 2026an, seigarren aldiz, Elhuyarrek “Otsailaren 11ko erakusleihoak” ekimena jarri du martxan. Emakume zientzialari baten ekimenez jaio zen kanpaina Zaragozan, eta 2021ean Elhuyarrek gurera ekartzea erabaki zuen. #O11erakusleihoak kanpainan, herrietako saltokien erakusleihoak emakume zientzialariez “janzten” ditugu; gero eta gehiago hedatzen doan ekimena da. Aurten Nafarroako erakusleihoak gehitu dira ekimenera, eta saltokien kopuruak gora egin du nabarmen. Udalerri hauetako saltokiak apaindu ditugu: Altsasu, Aretxabaleta, Arrasate, Barakaldo, Baztan, Bilbo, Burlata, Durango, Elgoibar, Erandio, Galdakao, Iruñea, Laudio, Legazpia, Mutilva eta Urduliz . Guztira 400 saltokitan ikusi ahal izango dira emakume zientzialariak. Saltokietako karteletako QRen bidez, ginkanan jolasteko aukera dago. 

Horrez gain, “Otsailaren 11 erakusleihoak” egitasmoan ikusgai egongo diren irudietan oinarriturik, “Zientzia-emakumeak argira” erakusketa egongo da ikusgai honako herritan: Aretxabaleta, Barakaldo, Baztan, Berriozar, Burlata, Donostia, Eibar, Izarbeibar, Legazpi, Ordizia, Tafalla eta Urduliz.  

Ilustratzailea: Izaskun Alberdi Landaluze