6-Vandana Shiva

Dehradun (India), 1952

Fisikan doktorea, aktibista ekologista eta ekofeminista.

Txikitatik bere gurasoengandik ikasi zuen natura maitatzen. Dehradunen Fisika ikasi zuen, eta, Bhabhako Ikerketa Atomikoko Zentroan denboraldi labur bat egin ondoren, Kanadara joan zen Zientziaren Filosofiako master bat egitera. 1979an, Fisika Kuantikoan doktoratu zen Ontarioko unibertsitatean.

1982an Ikerketa Zientifiko, Teknologiko eta Ekologikorako Fundazioa sortu zuen. Fundazio horren ekimenen artean daude nekazaritza ekologikoa bultzatu eta zabaltzea, biodibertsitatea aztertu eta mantentzea, mugimendu ekologistarekiko emakumeen konpromisoa sustatzea eta sentimendu demokratikoa berreskuratzea.

Shivak, indarkeriarik gabeko Gandhiren kontzeptuan oinarritua, emakume nekazariak bultzatzen ditu mendeetan zehar izan zuten papera berreskuratzera, haziak gorde (espeziea babesteko) eta berriro landatzera, nazioarteko merkataritza-legeei uko eginez edo merkatu-ekonomiaren arauei men eginez, beren merkatu independentea sortzeko.

1993an, mugimendu alternatiboetan egindako lanagatik eta, emakumea eta ekologia garapenari buruzko diskurtso modernoaren muinean jartzeagatik, Right Livelihood saria jaso zuen, “Nobel sari alternatibo” ere deitzen dena.

Vandana Shiva ekofeminismoaren ordezkari nabarmena da. Berak bizitza bezain aspaldiko mugimendu gisa definitzen du ekofeminismoa, eta bizitza antolaketa sozial, politiko eta ekonomikoaren erdian jartzean datza. Emakumeek egiten dute hori, haiei utzi baitiete bizitza zaintzeko eta mantentzeko lana.

Deskargatu irudia hemen klik eginda